CENTRAL VISAYAS-Ipakatap ang kapin sa usa ka gatos ka police personnel sa mga venue sa regionalized bar examination nga ipahigayon karong Septiyembre 17, 20, ug 24, 2023.
Matod ni Police Lieutenant Colonel Janette Rafter, deputy city director for operations sa Cebu City Police Office (CCPO), duha lang ka campus ang mopahigayon sa Bar Exam nga mao ang University of San Jose-Recoletos (USJ-R) Basak campus ug ang University sa San Carlos (USC) Main campus.
Aron maprotektahan ang palibot sa tunghaan, ang CCPO modestino og 102 ka polis sa USJ-R Basak ug 53 sa USC, uban sa mga opisyal sa Cebu City Transportation Office nga maoy modumala usab sa dagan sa trapiko.
Dugang pa, nga ang deployment sa kapulisan magsugod sa alas 2 sa kaadlawon sa Domingo tungod kay ang mga bar takers gipaabot nga moabot sa venue sa eksaminasyon uban sa mga ginikanan ug kabanay sugod alas 4 sa kadlawon.
Magbutang usab sila og advance command post alang sa emergency response ug kini pagadumalaon sa mga personahe sa Philippine National Police, Armed Forces of the Philippines, Explosive Ordnance Disposal ug Cebu City Disaster Risk Reduction and Management Office.
Sama sa naandan, dili tugotan ang mga drayber nga mobusina sa palibot sa duha ka unibersidad samtang nagpahigayon sa eksaminasyon.
Aron malikayan ang kasaba sa mga sakyanan, ipatuman ang road closure sa palibot sa USC.
Dugang pa, ang gawas nga lane sa USJ-R Basak Campus igahin alang sa mga sakyanan sa bar takers.
