CENTRAL VISAYAS- Nakadawat na og cash aid ang kapin sa 4,000 ka mga jeepney drivers sa Central Visayas.
Sumala sa pamahayag sa Department of Social Welfare and Development (DSWD) Field Office VII, malampuson nga na-apod-apod ang Cash Relief Assistance (CRA) ngadto sa 4,424 ka mga drayber sa public utility jeepney (PUJ) sa tibuok rehiyon.
Gipahigayon ang duha ka adlaw nga dungan nga payout activity niadtong Mayo 13 hangtod 14, 2026, isip dinalian nga tubag sa gobyerno sa nagpadayong kalisod sa ekonomiya.
Aron masiguro ang hapsay ug paspas nga proseso, nakigtambayayong ang DSWD-7 sa Land Transportation Franchising and Regulatory Board (LTFRB)-7, nga maoy naghatag sa validated list sa mga kwalipikadong benepisyaryo.
Sumala pa sa DSWD-7, ang maong inisyatibo subay sa direktiba ni President Ferdinand Marcos Jr. nga hatagan og dinaliang ayuda ang mga sektor nga labing naapektuhan sa pagsaka sa presyo sa lana, ilabi na ang mga drayber sa pampublikong sakyanan.
