MANDAUE CITY-Gikatahong kapin sa 500 ka mga drayber ang na-isyuhan og citation ticket sa Traffic Enforcement Agency of Mandaue human sa usa ka semana nga paglusad sa ‘Operation Counterflow.’
Gitino ni Edwin Jumao-as ang Executive Director sa TEAM Operations, nga kadaghanan sa mga nadakpan nga mga sakyanan mga motorsiklo, ingon man nga lakip niini ang pipila ka Public Utility Jeepneys.
Dugang pa, nga kadaghanan sa maong ihap mga drayber nga nasikop sa national highway sa Barangay Canduman, Basak, ug Tabok atol sa peak hours, mga alas 6 sa buntag hangtod alas 8 sa buntag.
Gani, ang maong Operation Counterflow gilusad sa TEAM niadtong Biyernes, Marso 1.
Gipahigayon kini kauban ang Highway Patrol Group ug ang Traffic Enforcement Unit sa Mandaue City Police Office, diin mas gipahugtan kini hilabi na sa rush hours sa buntag ug gabii.
Dugang pa, nga ang mga nadakpan sa TEAM gihatagan og citation ticket nga nagkantidad og P1,000, samtang ang nadakpan sa HPG ug TEU gihatagan og Temporary Operator’s Permits.
Nasayran usab nga ang unang kalapasan anaa sa P2,000, samtang anaa sa P5,000 ang
ikaduhang paglapas, ug P10,000 sa 3rd offense ug usa ka tuig nga suspensiyon sa Driver’s License.
