SUDAN-Moabot sa 85 ka tawo ang namatay sa pinakaulahing pag-atake sa Sudan paramilitary group nga Rapid Support Forces.
Nasayran nga ang grupo mihimo og pag-atake sa central province sa Sennar niining miaging semana ug walay duha-duha nga pagpamusil sa mga residente sa pipila ka mga baryo, samtang nangawat ug gipangsunog ang mga panimalay.
Lakip sa namatay mao ang 24 ka mga babaye, bata ug mga batan-on nga wala dayon mibakwit human makit-an sa mga pwersang paramilitar.
Basi sa giluwat nga pamahayag sa Sudan Foreign Ministry, gawas sa kapin 80 ka unang kompirmadong patay, moabot usab sa 150 ang naangol sa pag-atake ang sunodsunod usab nga gidala sa mga tambalanan.
Mopatim-aw nga mihimo na usab og laing pag-atake ang RSF human gikataho nga gipugngan sa mga residente sa maong baryo ang pag-atake sa pipila ka sakop sa paramilitar nga grupo.
Niadtong Hunyo, giatake niini nga grupo ang Singa, nga nagsilbing kapital sa lalawigan sa Sinnar ug sukad niadto padayon nga nag-atake didto.
Kini nunot sa panaghisgot sa kalinaw nga gisugdan niadtong miaging semana uban sa tabang sa US, Saudi Arabia, Egypt, United Arab Emirates, African Union ug United Nations.
