CEBU – Kapin sa P2 milyones nga balor sa shabu ang nasakmit sa mga otoridad gikan sa lima ka mga suspek lakip na ang usa ka magtutudlo sa sunodsunod nga anti-drug operations sa mga otoridad, Miyerkules sa lungsod sa Tuburan.
Unang nasikop si Brendo Aringay Villafranca, 34, usa ka magtutudlo sa pampublikong tunghaan ug residente sa Barangay Kansi, Tuburan.
Nakuhaan si Villafranca og usa ka paketeng shabu nga nagkantidad og P2,000, buy bust money ug iyang motorsiklo.
Sunod nga nasikop sa mga ahente sa Philippine Drug Enforcement Agency in Central Visayas (PDEA 7) si Lilia Hernane, 52, taga Bamboo Village, Barangay Basak Pardo. diin nakuhaan kini og 5 gramos nga shabu nga mobalor sa P34,000.
Motimbang sa 192.48 gramos nga mobalor ngadto sa P1,258,816 ang nakuha gikan sa usa ka Jame Paul Yuson Villegas, 30 anyos sa Barangay Cayang, Bogo City.
Samtang nasikop sa kapulisan sa Talisay City ang call center agent nga si Ronnel Ledesma Cabaron, 42, taga Barangay Bulacao ug nakuhaan og 50 gramos nga drugas nga mobalor og P340,000 ug buy bust money.
Nasikop usab sa Mambaling police station ang laing high value individual sa Sitio Tinabangay, Barangay Mambaling, dakbayan sa Sugbo nga si Jojie Diaz, 27, taga Sitio Huyong-huyong ug nakuhaan og 53 gramos nga shabu nga mobalor og P360,400.
Kasamtangang gitanggong sa lock-up cell sa police station ang mga suspek ug nag-atubang og kasong kalapasan sa Republic Act 9165 o Comprehensive Dangerous Drugs Act of 2002.
