PROVINCE OF CEBU- Milagda sa usa ka Memorandum of Understanding (MOU) ang kagamhanang lalawigan sa Sugbo tali sa Suez Services PTE. Limited alang sa planong pagtukod sa labing una nga Waste-to-Energy (WTE) facility sa lalawigan.
Ang maong kasabutan gilagdaan nila Cebu Governor Gwendolyn Garcia ug ni Project Development Director sa Suez Group Kohei Kimura sa Cebu Provincial Capitol niadtong adlaw sa Miyerkules, Nobyembre 20, 2024.
Kini human nga giaprubahan sa Economic Enterprise Council (EEC) ang unsolicited preliminary proposal sa Suez Group nga makig-alayon sa kagamhanang lalawigan alang sa himuon nga WTE ubos sa Build Operate and Transfer (BOT) nga paagi.
Ang Suez Group usa ka French-based global utility company nga nag operate sa 70 ka mga nasod ug nag-specialize sa water and waste management.
Lakip sa ilang operasyo kay mao ang waste treatment, recycling, resource recovery, water management, ug technology development.
Matod pa Governor Garcia nga dako kining tabang sa pagsulbad sa problema sa basura og suplay sa enerhiya sa probinsya.
Pagatukuron kini sa 7.6 ektarya nga luna sa kagamhanan sa Barangay Tinaan, Dakbayan sa Naga nga gibana-banang muabot sa P9.12-bilyones ang gipuhunan sa Suez Group alang sa maong proyekto.
Gilauman usab nga maglagdaay pag-usab ang duha ka panig inig Disyembre 16 atol sa Christmas Lighting sa Kapitolyo aron sa pagpakita sa hayag nga paglaum sa dugay nang gikahinam nga WTE facility sa Sugbo.
