Nagoul ang pipila ka mga progresibong grupo sa gidangatan sa laing progresibong grupo nga Greenpeace Philippines, human nga gisikop ang 5 ka miyembro niini human sila nagpahigayon og protesta duol sa venue sa ika-48 nga ASEAN Summit 2026 sa Sugbo aron manawagan og mas lig-on nga aksyon batok sa polusyon ug plastic waste crisis sa rehiyon, niadtong Biyernes, Mayo 8, 2026.
Matud ni Teody Navea, ang Secretary General sa Sanlakas Cebu, nga nagoul sila human masayri nga gisikop ang pipila ka indibidwal nga nagpahigayon og protesta sa Dakbayan sa Lapu-Lapu.
Sigon niini nga dapat unta gipahibalo sa mismong grupo ang ilang tumong ug tuyo sa ilang mga panawagan, aron paglikay sa komosyon batok sa mga sakop sa kapulisan.
Gihimug-atan ni Navea, nga importante ang pagpadayag sa mga lakang nga paggabuhaton sa lihok protesta, aron hingpit nga mapahibalo ang awturidad ug walay katungod nga mayatakan.
Dugang pa niini nga mahinungdanon ang pagpahigayon og lihok protesta atol sa mga International events sama sa ASEAN Leaders Summit aron mapadayag ang mga panawagan ug mensahe nga angayang ipaabut.
Gidayeg usab sa Sanlakas Cebu, ang gipakita nga pagrespeto sa katungod sa mga rallyista atol sa pagpahigayon nila og protesta doul sa Lapu-Lapu Bridge, gumikan kay daw miduyog usab ang mga kapulisan sa ilang panawagan.
Hinungdan nga angayan gayud nga klaruhon sa mga magpahigayon og protesta ang ilang mensahe aron makasabut usab ang anaa sa awturidad sa ilang baruganan.
