CEBU CITY — Gihatagan og pagtagad sa Cebu Provincial Government ang importansya sa mga kabataan ubos sa pagsaulog sa 27th National Children’s Month.
Kini subay na sa tema nga “Karapatang Pambata, patuloy na pahalagahan at gampanan tungod sa magandang kinabukasan.”
Nagtapok kagahapon sa Cebu Provincial Capitol ang moabot sa 500 ka mga ginikanan, day care workers, ug municipal social welfare workers alang sa maong kasaulugan.
Mitambong atol sa maong aktibidad ang mga department heads, lakip na ang mga provincial board members sa Sugbo.
Usa sa mga aktibidad mao ang indigay sa mga talento diin nagtigi ang 22 ka mga bata nga nag-edad og tres ngadto sa kwatro anyos gikan sa managlahing local government units sa Sugbo.
Nakadaug sa maong kompetisyon ang mga pambato gikan sa Consolacion isip 1st prize, Barili sa 2nd prize, ug sa Badian alang sa 3rd prize.
Samtang laing indigay usab sa kanta ug draw-and-tell ang ipahigayon karong Nobyembre 21 sa Cebu Administrative Building sa Kapitolyo.
Gipakita sa Cebu Provincial Government ang paghatag og pagtagad alang sa mga kabataan subay na sa kasaulugan sa National Children’s Month. (gn)
