CENTRAL VISAYAS-Nangandam na sa seguridad ang Police Regional Office sa Central Visayas (PRO 7) alang sa pagsugod sa klase sa mga pampublikong tunghaan karong Agosto 29, 2023.
Kini ang gibutyag sa tigpamaba ni PRO 7 Director Brigadier General Anthony Aberin, nga si Police Lieutenant Colonel Gerard Ace Pelare, nga ang tanang hepe sa police station sa Central Visayas gimanduan sa pagbutang og police assistance desk aron makatabang sa mga tinun-an ug makapausbaw sa police visibility sa kadalanan.
Gisugo ni Aberin ang iyang mga tawo nga motambong sa miting sa Parents-Teachers Association aron mahibal-an kung unsa nga tabang ang ilang mahatag aron masulbad ang mga isyu sa eskuylahan ug mag-organisar og mga programa nga makapugong sa mga estudyante sa paggamit sa ilegal nga droga ug pag-apil sa ilegal nga sugal aron mapalig-on ang ilang relasyon sa mga magtutudlo ug mga estudyante.
Nasayran nga ang mga pulis mogawas sa kadalanan sa unang adlaw sa klase aron masiguro ang kaluwasan sa mga estudyante.
