LAPU-LAPU CITY-Padayong nag-monitor ang Lapu-Lapu City Police Office (LCPO) sa mga politiko nga ilang gikonsiderar nga target personalities hulip sa umaabot nga Barangay ug Sangguniang Kabataan Elections (BSKE) karong Oktubre 30, 2023.
Kini ang gitino ni Police Colonel Elmer Lim, city director sa Lapu-lapu City Police Office, nga ila kining gihimo aron maprotektahan ang mga politiko ilabi na kadtong nakadawat og hulga.
Niini, giawhag ni Lim ang mga politiko nga makadawat og hulga sa pagduol kanila aron mahatagan sila og dugang proteksyon samtang nagsingabot ang piniliay.
Gawas niini, si Lim niingon nga ila usab nga rondahon ang mga pinuy-anan niadtong mga politiko nga makadawat og hulga.
Matud pa ni Lim nga ilang gibantayan ang mga personalidad nga ilang gituohan nga makamugna og kagubot panahon sa eleksyon, sama sa gun-for-hire groups, criminal gangs, ug private armed groups.
Ang LCPO padayon nga nakig-alayon sa COMELEC sa pagpahigayon og mga checkpoint alang sa piniliay.
Gitino sa opisyal nga ang dakbayan sa Lapu-Lapu gibutang ubos sa “normal nga sitwasyon” sa COMELEC, nga walay immediate concern sa umaabot nga Barangay ug SK elections.
