CEBU – Nagpadayon pa ang imbestigasyon sa kapulisan sa kamatayon sa usa ka factory worker sa dakbayan sa Mandaue.
Gipahibalo ni Police Lieutenant Colonel Franco Rudolf Oriol, ang deputy city director for operations sa Mandaue City Police Office (MCPO), ilahang gilantaw karun kung ang kamatayon sa 32-anyos nga si Stephen Corilla kay aksidente, pagpabaya sa management o adunay foul play human nga gikonsiderar nga duha ka semana pa lang kini nga nagtrabaho sa maong kompanya.
Matud pa, nakig-alayon man usab sa ilahang imbestigasyon ang management sa Universal Robina Corp., ingon man nga aduna na’y inisyal nga panag-istorya ang pamilya sa biktima ug sa naasoy nga kompanya.
Kahinumdoman nga niadtong Hunyo 2, patay si Corilla human kini nga giingong gilamoy sa pulverizing machine sa dihang iyaha kining gilimpyohan.
Ang kamatayon niini nahitabo ala 1 sa hapon, apan gipahibalo ang pamilya alas 3 na sa hapon.
Tanghaga usab sa kapulisan nganong mismo ang asawa pa sa biktima ang nag-report sa kapulisan ug dili mismo ang management sa URC sa dihang nahitabo ang insidente.
