CEBU – Anaa sa full alert status ang Cebu City Police Office alang sa Pasigarbo sa Sugbo karong Domingo, Agosto 28, 2022.
Kini ang gibutyag ni Police Lieutenant Colonel Janette Rafter, deputy director for operations sa CCPO, nga kapin o kulang 3,000 ka security personnel ang giandam alang sa deployment karong umaabot nga Domingo.
Apil na niini ang mga personahe sa Armed Forces of the Philippines, Philippine Coastguard, Cebu City Disaster Risk Reduction Management Office, ug uban pang hingtungdang ahensya.
Nasayran nga moabot sa 50 ka LGUs ang mosalmot sa “festival of festivals” karong tuiga nga adunay duha ka bisita gikan sa Lapu-Lapu City ug Cebu City.
Kung kahinumduman ang Pasigarbo sa Sugbo, kabahin sa tinuig nga mga kalihokan alang sa founding anniversary sa Cebu Province, mobalik human sa duha ka tuig nga paghunong tungod sa COVID-19 pandemic.
