CENTRAL VISAYAS-Nagporma og tracking teams ang kapulisan sa Central Visayas, nga maoy motutok sa pagpangita karon ni Negros Oriental Representative Arnulfo Teves ug sa mga cohorts niini human niluwat na og e-warrant of arrest ang korte batok kanila.
Una nang gibutyag sa Kampo Krame nga gimanduan nila ang Police Regional Office sa Central Visayas (PRO-7) sa pagpangita kang Teves diin nakig-alayon usab sila sa international police.
Matod ni PLt. Col. Gerard Ace Pelare, ang tigpamaba ni PRO7 Director Brig. Gen. Anthony Aberin, nga aduna gihimo nga police intervention ang rehiyon 7 aron ilahang malocate ang mga wanted persons.
Nasayran nga ang Manila Regional Trial Court nipagawas na og electronic warrant of arrest batok kang Congressman Teves ug sa tulo ka mga cohorts niini sa pagpatay kang Negros Oriental Governor Roel Degamo.
Sigon ni Pelare nga ang ilahang tracker team wala lang nakatutok kang Teves apan lakip na ang mga gikatahong indibidwal nga adunay mga warrant of arrest ug adunay koneksyon sa congressman.
Giawhag karon sa PRO-7 ang publiko, ilabi na ang mga taga Negros Oriental, kun aduna impormasyon kabahin sa lokasyon ni Congressman Teves makigalayon dayon sa kapulisan aron sa ilahang dali nga pag-askyon.
