CEBU – Gisusi sa kapulisan sa dakbayan sa Sugbo kon responsable ba ang 18-anyos nga lalaki, kinsa nakuhaan og ilegal nga drugas ug armas nga way lisensya, atol sa buy-bust operation sa Barangay Carreta, dakbayan sa Sugbo, sa niaging mga pagpamusil sa dakbayan.
Nagkanayun si Police Colonel Ireneo Dalogdog, hepe sa Cebu City Police Office, nga ilang gisusi kon ang drug suspect nga si John Art Arabis giingong usa ka “noted hitman” ug giingong responsable niining mga pagpamusil kaniadto.//
Matud pa ni Dalogdog nga ila kining gisusi tungod kay ilang nasuta nga si Arabis ang giingong misuway og pusil sa mga polis sa City Mobile Force Company (CMFC) nga nagpahigayon og anti-illegal gambling operation sa Barangay Lorega San Miguel ning dakbayan niadtong Septiyembre 5, 2022.
Dugang pa sa hepe sa CCPO nga wala nila ibaliwala ang posibilidad nga ang nadakpan nga suspek adunay mga kauban sa ilegal nga kalihokan nga iyang giapilan.
Matud pa ni Dalogdog nga sa pagkakaron mao na kini ang ilang gitrabaho.
Gawas niini nga imbestigasyon, ang kadagkoan sa CCPO niingon nga niadtong Biyernes, Disyembre 9, ilang gipasaka ang mga reklamo batok sa mga Arabis sa Cebu City Prosecutor’s Office.
Kung diin si Arabis nag-atubang og mga reklamo sa pagbaligya ug paghupot og ilegal nga drugas, illegal possession of firearms ug pagsuway sa awtoridad.
