Gihingusgan sa Police Regional Office sa Central Visayas (PRO-7) ang ilang seguridad alang sa umaabot nga Semana Santa pinaagi sa dugang police visibility ug pagtukod og dugang police outposts sa convergence areas sa tibuok rehiyon.
Kini ang gipahibalo ni Police Colonel Arvie Aserre Paraon-Bueno, tigpamaba sa PRO-7, nga adunay dugang mga outpost sa mga simbahan ug uban pang sikat nga lugar nga mamahimo nga lagan sa mga turista.
Gihatagan niini og gibug-aton nga igo na ang gidaghanon sa mga personahe ang na-deploy aron motutok sa trapiko ug pagkontrolar sa katawhan.
Subay niini, gipahinumdoman usab sa opisyal ang publiko nga buhaton usab ang ilang bahin sa pagpatunhay sa kalinaw ug kahusay, kini aron magmalinawon ang selebrasyon.
Sa pikas bahin, nipahinumdum usab kini sa mga kandidato alang sa umaabot nga 2025 midterm elections nga tahuron ang paghandum ug mga kalihokan sa Semana Santa, nag-awhag kanila nga likayan ang paggamit sa kalihokan alang sa pagpangampanya.
Gipaambit usab ni Bueno nga ipadayon sa PNP Region 7 ang ilang threat assessment sa mga lugar nga delikado sa election-related violence.
Dugang pa, nakigtambayayong sila sa ubang mga ahensya sa pagpahigayon sa mga kampanya sa pagkahibalo sa publiko, pag-deploy sa gikinahanglan nga mga personahe, ug pag-install sa mga tim sa dali nga pagtubag sa mga importanteng lugar.
