CEBU CITY-Gimandoan ang tanang police station sa dakbayan sa Sugbo ug mga special unit nga moabag sa manhunt operation batok sa duha ka suspetsado nga mipusil patay kang Police Staff Sergeant Ryan Languido Baculi sakop sa Regional Police Drug Enforcement Unit 7 atol sa buy bust operation sa Barangay Kinasang-an.
Matod ni Police Lieutenant Colonel Janette Rafter deputy city director for operation sa CCPO nga ang Inayawan police station apil na ang Police Regional Office 7 ang nag himo sa imbestigasyon sama sa pagkuha sa mga ebidensya sa nahitabong krimen.
Subay niini adunay mga impormasyon nga nasigpatan ang duha sa probinsya sa Sugbo apan miawhag ang kapulisan nga motawag dayon sa labing duol nga police station aron ila ning madakpan.
Gibutyag ni Rafter nga si Atong Rafols nabilango na sa Operation Second Chance sa dihang nakapatay kini sa dihang menor de edad pa kini ug nabalhin sa Cebu City Jail sa dihang naabot sa legal age na kini sa kasong murder.
Sa dihang naka serbisyo sa iyang salaod pag gawas niya naka patay na usab kini maoy hinungdan nga nalutsan siyag warrant of arrest sa kasong murder.
Sa laing bahin, mihatag og pasidungog si PRO 7 Director Police Brigadier General Anthony Aberin kang Police Corporal Ryan Baculi.
Gidugang niini nga isip iyang mga kaubang opisyal, ilang gisaad ang walay hunong nga mga paningkamot nga madala ngadto sa hustisya ang mga sad-an, respetuhon ang hustong proseso sa tanang panahon.
Diin ang ilang pasalig ug tinguha dili matarug; dili sila mopahulay, dili matulog hangtod nga manubag ang iyang walay kasingkasing nga mga mamumuno.
Sa samang higayon, gihimo ang makuti ug walay gidapigang imbestigasyon aron masayran ang kamatuoran luyo sa mga taho nga gitabangan sa barangay security personnel ang mga suspek.
