CEBU CITY-Gibutyag sa director sa Cebu City Police Office (CCPO) nga si Police Colonel Ireneo Dalogdog nga kanunay ang ilang koordinasyon sa mga sakop sa Bureau of Jail Management and Penology (BJMP-7) kalabot sa padayon karong pagtumbok sa ilang mga dinakpan sa mga anti-drug operation nga anaa sulod sa Cebu City Jail ang ilahang kontak.
Gawas sa mga sakop sa BJMP-7, kanunay usab nga nakig-alayon ang kapulisan sa Philippine Drug Enforcement Agency (PDEA-7) kalabot niining maong mga pasangil.
Pasabot ni Dalogdog nga sila ug ang ubang law enforcement agency kanunay nga nagbinayloay og mga impormasyon nga makatabang sa ilang mga operasyon.
Nasayran nga matag higayon nga adunay masikop ang kapulisan sa dakbayan sa sugbo nga mga tigpayuhot og ginadiling drogas kanunay gayud nila nga itumbok ang mga persons deprived of liberty kun PDL sa Cebu City Jail.
Una nang nibutyag ang kadagkuan sa Cebu City Jail nga ang pasangil sa mga dinakpan sa kapulisan sa ilang anti-drug operation gipaubos na sa pakisusi sa ilang Intel and Investigaton Division diin lakip sa ilang gisusi kon tinuod ba ang mga pangalan sa mga PDL nga gibungat sa mga dinakpan.
