CEBU CITY-Hingpit nga gipangandaman sa mga kapulisan ug kagamhanan sa syudad sa Sugbo ang umaabot nga adlaw sa Kalag-Kalag 2023.
Gihisgutan ang maong lakang atol sa gipahigayong meeting sa milabay nga semana nga gitambongan sa mga pangu sa kapolisan dinhi sa syudad sa Sugbo pinangulohan ni P.Col Ireneo Dalogdog, Cebu City Disaster Risk Reduction and Management Office CCDRRMO head Harold Alcontin, Department of General Services Head Ian Hassamal, City Transportation Office head Raquel Arce, Chairman sa Peoples Law Enforcement Board PLEB Konsehal Philip Zafra ug uban pang mga empleyado sa city government.
Nibutyag si Police Lt. Col. Janette Rafter, Deputy City Director for operations sa CCPO, nga sa pagpaabot sa ikaduhang dakong kalihukan human sa eleksiyon karong Oktubre 30, andam sila nga mopakatap og mga uniformed personnel sa matag dapit aron masiguro ang kalinaw ug kahapsay ilabi na sa mga dapit kung diin adunay mga dagkong sementeryo.
Sa laing bahin, duha ang gideklarar nga holiday, All Saints’ Day ug All Souls’ Day sa Nobyembre 1 ug 2, sunodsunod,nga motugpa usab human sa eleksyon.
Sa pagpaabot niining duha ka mga panghitabo, si Rafter niingon nga ang mga pulis sa dakbayan sa Sugbo gidasig sa paglugway sa ilang mga katungdanan sa seguridad aron masiguro ang kaluwasan sa publiko.
Gidugang sa opisyal nga ang ilahang deployment plan alang sa Nobyembre 1 ug 2 nadesisyonan na ug andam na nga ipatuman.
