Gibasura sa korte ang kasong paggamit ug pekeng dokumento tungod sa kakuwang sa ebidensiya nga gipasaka batok sa usa ka lalaki kinsa gidakop kay giingong nagpaila nga nanag-iya og yuta sa Zone Ahos, Brgy. Paknaan, Mandaue City niadtong Abril 2022.
Base sa gipagawas nga order ni Judge Jenelyn Forrosuelo sa Municipal Trial Court in Cities (MTCC) Branch 4 nga pinetsahan og July 9, 2024, ang korte mibasura sa kalapasan sa Art. 172 sa Revised Code o ‘use of falsified documents’ nga gipasaka batok kang Raul Villacarlos Canoy tungod sa kakuwang sa ebidensiya.
Ang korte sab mipahibalo sa piskalya, representate sa Mandaue City Government, ug sa mga partido nga nalambigit may kalabot sa kalamboan sa maong kaso.
Kahinomdoman nga gidakop si Canoy sa mga operatiba sa National Bureau of Investigation-Cebu District Office si Canoy niadtong Abril 2022 tungod sa reklamong gipadangat sa Mandaue City Government nga naghupot si Canoy og mga pekeng dokumento ug pagpamaligya ug yuta sa Zone Ahos, Brgy. Paknaan, Mandaue City. | report by Bombo Rexmond Cortes Omega
