Gibutyag ni Registered Environmental Planner, ENP. Gus Agustos, nga huyang ra ang kaso nga gipasaka sa buhatan sa Department of Environmental and Natural Resources batok na sa Monterrazas De Cebu, mahitungod na sa mga kalapasan niini sa pagpatukod ngadto sa kabukiran sa Guadaupe, nga maoy gitudlong rason sa nasinating grabeng baha sa dakbayan.
Matud ni Agustos, nga maayung balita sa mga Sugboanon ang mga lakang nga gibuhat sa DENR apan matud pa huyang ra ang pagpasaka niini kumpara sa posibleng mga kalapasan sa Monterazzas, diin base sa mga pagdungog sa Senado, adunay 10 counts of violations sa Environmental Certificate of Compliance.
Gawas niini, adunay pay mga kalapasan mahitungod sa National Building Code og Clean Water Act, ug uban pang mga kalapasan nga matud pa kinahanglang i-upgrade ang gipasakang kaso aron manubag gayud ang nahisgutang Kompanya.
Sigon usab ni Agustos, nga gamay ra ang maong kaso ug mamahimo ra gyung makaikyas ang Monterazzas sa mga gipahamtang niini gumikan kay dili applicable ang maong mga kaso nga gipasaka ubos sa Section 77 sa Forestry Code.
Gihimug-atan niini nga ang gitukuran sa Monterazzas makonsiderar gayud nga usa ka forest land, apan ang nakalahian lang gumikan kay daan nang nakatitulo niadtong 1950s sa DENR apan sigon niini nga mamahimo kining babagan sa kagamhanan ubos sa Presidential Decree 705 sa Forestry Code, nga kinahanglang walay usbon sa kabukiran diin sukwahi sa pagtukod niini.
Dugang usab ni Agustos, nga kinahanglang gikonsiderar sa lokal nga kagamhanan hilabi na sa dakbayan ang pag-susi sa National Laws una nagtugot sa pagpatukod sa Monterazzas aron malikayan ang kadaot susama sa mga pagbaha.
Sa pikas bahin usab, nanghinaot kini nga tarungon sa kagamhanan sa dakbayan sa Sugbo ang pagsusi sa maong kaso, aron di na mahisusama sa mga nahitabo sa nakalabayng katalagman og kinahanglang hatagag pagtagad ang precautionary measures.
