CEBU CITY-Nagkaminus na ang gidaghanon sa mga nataptan sa sakit nga dengue sa dakbayan sa Sugbo matod pa sa datos nga nahipos sa Cebu City Health Department (CHD) nga gi-anunsyo ni Cebu City Mayro Raymond Alvin Garcia sa pakighinabi niini sa mga tigbalita niadtong Disyembre 16, 2024.
Matod pa ni Mayor Garcia nga ang maong datos kay hinipos gikan pag Enero 1 hangtod Disyembre 7 ning kasamtangang tuig diin sa nakalabayng buwan lang makita ang gidaghanon nga gitanyag ang dakbayan sa pinakadaghang kaso sa tibuok nasod.
Sa pagkakaron kay nagpakita na sa “downward trend” sa gidaghanon sa aktibong kaso kun itandi sa mga nakalabayng buwan.
Dugang sa Mayor nga mapasalamaton kini sa tinguha sa buhatan sa CHD sa paningkamot niini ilabi na sa mga preventive measures niini.
Laing pasalamat sab ang gipaambit niini sa mga opisyales ug mga trabahante sa kada barangay sulod sa dakbayan sa pagtinabangay sa pakigbatok sa maong sakit aron maminosan ang mga kaso sa dengue.
Matod pa nga sa pagkakaron gikan niadtong Disyembre 1 hantod 7 kay aduna nalay 15 ka mga aktibong kaso sa dengue sa dakbayan.
Sumala sa CHD, niabot sa 4,132 ka mga kaso sa dengue dinhi sa dakbayan sa Sugbo gikan sa Enero 1 hangtod Disyembre 7, diin 21 sa mga biktima ang namatay.
Sagad sab sa nataptan sa maong sakit nagpangidaron og usa ka tuig ngadto na sa 10 anyos, nga may 1,923 ka mga kaso, gisundan sa 11 ngadto sa 20 anyos, nga niabot sa 1,115 ka mga kaso.
Subay sa samang datos, magkataas ang grupo sa mga edad kay magkaminos sab ang mga nataptan sa sakit.
