CEBU – Nituo si Lapu-Lapu City Mayor Junard “Ahong” Chan nga dili makaapekto sa industriya sa turismo sa dakbayan ang pagkasikop sa duha ka Chinese national nga giingong nalambigit sa kidnap for ransom activities.
Gitino ni Chan, nga dili kini maka-apekto sa mga bag-ong turista gumikan ang mga Chinese nga nadakpan gikatahong nag-unay ras ilahang kaugalingon.
Kahinumdoman nga gidakop sila si Xue Rong Tongug Li ug Gou Min sa usa ka safe house sa Sitio Soong II, Barangay Mactan, dinhi sa mga sakop sa Anti-Kidnapping Group (AKG) Visayas Field Unit Seven, ug sa Lapu-Lapu City Police Office (LCPO).
Atol sa mga operasyon, naluwas usab sa mga operatiba ang biktima sa kidnap nga si Li Hong Yu, 34-anyos ug usa ka negosyante ug nasayran nga nangayo ang mga suspek og ransom money nga nagkantidad og $200,000 o P10 milyones sa pamilya sa biktima.
Dugang pa sa mayor nga dili ki maoy unang insidente sa pagpangidnap gumikan ang unang insidente sa kidnapping nahitabo unom na ka buwan ang nakalabay, apan nakahukom ang biktima nga dili na pasakaan og kaso ang mga suspek.
