Miabot na sa 11,965 ang gidaghanon sa mga natala nga kaso sa leptospirosis sa tibuok nasud hangtod sa Setyembre 23, sumala sa Department of Health o DOH.
Kini nga ihap mas taas og 46 porsyento kon itandi sa 8,189 ka kaso nga natala sa susamang panahon niadtong miaging tuig.
Samtang, mas ubos ang gidaghanon sa mga kaso sa dengue karong tuiga.
Natala sa DOH ang 168,060 ka kaso sa dengue, nga nagpakita og 30 porsyento nga pagkunhod kon itandi sa susamang panahon sa miaging tuig.
Apan, ang kinatibuk-ang case fatality rate, o ang porsyento sa mga namatay taliwala sa mga natala nga kaso, miabot sa 5.08 porsyento karong tuiga.
Sumala sa DOH, adunay igong suplay sa mga tambal alang sa mga pasyenteng adunay leptospirosis.
Gikatahong gipang-apod-apod na ang maong mga tambal sa nagkalain-laing bahin sa nasud bisan sa wala pa magsugod ang ting-ulan.
Padayon nga nag-awhag ang DOH sa publiko nga mokonsulta dayon sa doktor kung makasinati og mga sintomas sama sa taas nga hilanat ug grabeng sakit sa kalawasan, ilabi na human makalusong o ma-expose sa tubig-baha.
