Padayon ang pagbangon sa mga survivor sa linog sa Bogo City, usa ka tuig human sa kusog nga linog nga miigo niadtong Setyembre 30, 2025, nga nagbilin og dakong kadaot sa mga panimalay, eskwelahan ug nagkalain-laing pasilidad.
Apan bisan milabay na ang usa ka tuig, nagpabilin gihapon ang emosyonal nga epekto sa maong kalamidad, ilabina sa pipila ka mga residente, magtutudlo ug estudyante nga naglisod pa sa pagproseso sa ilang traumatic nga kasinatian.
Sa pakighinabi sa Bombo Newsteam, gibutyag ni Faith Marie A. Macasil, school principal sa Araneta Academy Inc. ug professor sa Cebu Roosevelt Memorial Colleges, nga adunay mga magtutudlo ug estudyante nga nagkinahanglan gihapon og panahon ug emosyonal nga suporta aron hingpit nga makarekober gikan sa ilang nasinati.
Matud ni Macasil, adunay pipila nga makasinati gihapon og kahadlok, ilabina panahon sa kusog nga ulan, tungod kay makapahinumdom kini kanila sa makalilisang nga panghitabo atol sa linog.
Hinungdan, nga nakigtambayayong usab ang eskwelahan sa Department of Health alang sa psychosocial support ug pagtabang sa mga magtutudlo sa pagproseso sa ilang emosyonal nga kahimtang human sa kalamidad.
Samtang adunay mga estudyante nga hinay-hinay nang nakabalik sa ilang naandan nga kinabuhi, lahi-lahi usab ang ilang kahimtang, ilabina ang mga bata nga nawad-an og mga minahal sa kinabuhi ug nakasinati og kadaot sa ilang mga panimalay.
Gipaambit usab niini, nga usa ka tuig human sa linog, nagpadayon gihapon ang mga paningkamot sa rehabilitasyon ug pagbangon sa mga komunidad nga naapektuhan sa maong kalamidad.
Gihatagan usab ni Macasil og gibug-aton ang kamahinungdanon sa pagpangandam sa mga kalamidad, nga matud pa niya, mahimong mahitabo bisan kanus-a ug bisan asa.
Dugang pa niya, dako usab og papel ang suporta sa pamilya, eskwelahan ug komunidad sa pagtabang sa mga naapektuhan nga mabuntog ang ilang kahadlok ug makapadayon pag-usab sa kinabuhi.
