Padayon gihapon ang pagbangon ug rehabilitasyon sa Bogo City hapit na mag-usa ka tuig human sa kusog nga linog nga miigo sa northern Cebu.
Matud ni Cebu 4th District Board Member Celestino “Tining” Martinez, usa sa mga hagit nga giatubang sa Bogo ug uban pang mga lungsod nga naapektuhan sa linog mao ang padayon nga mga aftershock.
Gidugang niini,nga lahi ang epekto sa linog kumpara sa bagyo tungod kay human sa unang pag-igo niini, mosunod pa ang mga aftershock nga mahimong makaapekto pag-usab sa mga estruktura nga giayo o gitukod.
Busa, kinahanglan matud pa niya nga konsiderahon pag-ayo sa gobyerno ang kahimtang sa yuta ug ang posibilidad sa mga sunod nga pag-uyog sa dili pa paggastusan ang dagkong proyekto sa rehabilitasyon.
Dugang ni Martinez, bisan pa og mikunhod na ang mga aftershock, nagpabilin gihapon kining usa ka kabalaka sa pagpadayon sa mga proyekto sa pagbangon sa Bogo City.
Bisan pa sa mga hagit, padayon ang paningkamot sa lokal nga panggamhanan sa pag-rehabilitate sa mga nadaot nga imprastraktura ug pagpauswag pag-usab sa ekonomiya sa Bogo City ug sa ubang mga lugar nga naapektuhan sa linog.
Sa pikas bahin, gihisgutan usab ni Martinez ang sinkhole nga mitumaw sa Bogo human sa linog.
Matud niya, swerte nga ang nahitabong sinkhole nahimutang layo sa sentro sa siyudad ug sa mga lugar nga daghan og nagpuyo.
Gipasabot ni Martinez nga ang pipila ka lugar mahimong mas daling maapektuhan sa pagkalubog o pag-collapse sa yuta tungod sa kahimtang sa ilalom niini, lakip na ang presensya sa tubig ug soil erosion.
