Padayon sa pagkadako ang sinkhole sa Sitio Indilicio, Purok Libog 1, Barangay Guadalupe, Bogo City, Cebu, diin ang ubang bahin sa kilid niini padayon usab nga nangatumpag.
Base sa assessment sa Mines and Geosciences Bureau Region 7 o MGB-7 niadtong Agosto 22 ug 23, giklasipikar ang maong lugar isip “high-risk ground collapse area.”
Gibanabana sa MGB-7 nga ang cover collapse sinkhole mikabat na og 15 meters per 25 metros, ug midako pa kini og kapin duha ka meters sulod lamang sa Agosto 22 hangtod 23.
Madungog usab sa mga geologist ang mga rumbling sound sa ilawom sa yuta, nga posibleng timailhan sa padayong pagkahugno sa subsurface cavity.
Base sa drone imagery ug visual survey, adunay underground cavity nga gibana-banang anaa sa 15 metros ilawom sa yuta, ug mas nakapabalaka usab ang presensya sa groundwater flow nga mahimong timailhan nga mas lapad pa ang underground cavity system.
Hinungdan nga girekomendar sa MGB-7 ang pre-emptive evacuation sa mga residente ilabi na panahon sa kusog nga ulan, lakip usab ang pagpatuman og minimum 20-meter no-entry buffer zone gikan sa kilid sa sinkhole, samtang labing menos 50 metros nga controlled-access zone alang sa mga onlooker ug dili residente.
Dili usab kini ang unang sinkhole sa maong lugar, tungod kay duha pa ka mas karaan nga cover collapse sinkholes ang nakit-an sa palibot—usa mga 100 metros sa southwest ug usa mga 65 metros sa northeast sa bag-ong sinkhole.
Sumala sa MGB-7, ang duha ka karaang sinkhole naporma human sa 2025 Bogo Bay Fault earthquake.
Gipahimangnoan sa MGB-7 ang mga residente nga i-report dayon sa Bogo City CDRRMO ang bag-ong mga liki sa yuta o dili kasagarang mga tingog.
Gipahimangnoan usab ang publiko batok sa pagpakaylap og unverified information, exaggerated figures, ug manipulated photos ug videos bahin sa sinkhole.
Samtang nagpabiling aktibo ang ground collapse, wala usab gitugotan ang pagsulod sa restricted buffer zone bisan alang sa pagkuha og content o video.
