Gipahibalo sa kagamhanan sa Dakbayan sa Sugbo ang pagpahigayon og usa ka summit aron pag-andam sa dakbayan sa posibleng epekto sa El Niño.
Sumala ni Kenneth Siasar, ang Chief of Staff ni Cebu City Mayor Nestor Archival, ang maong summit maglakip sa nagkadaiyang situational reports gikan sa nag-unang mga departamento ug ahensya, diin hatagan og overview sa El Niño ug kun unsa ang angay lauman gikan sa Cebu City Disaster Risk Reduction and Management Office (CCDRRMO).
Hisgutan usab sa maong panagtigom ang panginahanglan sa tubig sa mga mag-uuma ug status sa mga pananom diin pangulohan sa City Agriculture Department Head nga si Mr. Joey Baclayon.
Dugang pa ni Siasar, gipahigayon usab ang pag-imbitar sa mga kapitan sa 80 ka barangay ingon man sa mga sakop sa media isip mga reactors ug maghatag og input, sanglit sila man ang direktang nakadawat sa mga reklamo ug problema sa mga lumulupyo.
Ang pangunang katuyoan sa maong summit mao ang pag-umol og mga konkretong pamaagi ug solusyon alang sa short-term, medium-term, ug long-term nga plano sa dakbayan batok sa huwaw. via Bombo Fonz Cabrillos
