CEBU – Daghan sa mga Pilipino ang ni-angkon nga nakasinati sila og kapobrehon ug gi-angkon nila nga kabus ang ilahang panginabuhi.
Kini base na usab sa datos nga gipagawas sa Social Weather Survey (SWS).
Gihimong basehan sa maong survey ang pamilya nga adunay lima ka miyembro ug adunay monthly income ng P8,000 -P12,000.
Matod pa ni Atty. Jonathan Capanas, dean sa USJR College of Law ug usa ka economic professor, nga ang survey sa SWS usa ka repleksyon sa tinuod nga kahimtang sa mga Pilipino sa nasod gumikan sa kamatuoran nga pagsulbong sa pandemya daghan ang nawad-an sa ilahang tagsa-tagsa ka panginabuhian.
Gidugang ni Capanas, nga usa sa nakapadugang sa kalisud sa katawhan karon mao ang nagkasaka nga inflation diin mas nisamot ka mahal ang mga nag-unang palaliton apan nagpabilin lang gihapon nga gamay ang sweldo.
Gitino niini nga lisud na kwentahon kung pila ang ideal nga sweldo alang sa usa ka indibidwal gumikan kinahanglan na nga kwentahon ang tanang butang gikan sa pagkaon, pamlete ug uban pang mga butang nga gikinahanglan sa usa ka tawo.
SIgon pa ni Capanas nga usa ka dakong hagit ang gi-atubang karon sa katawhang Pilipino ug moabot ang panahon nga mismong ang mga tawo na ang magdaginot ilabi na kung populasyon na ang hisgutan.
