CEBU CITY-Pormal na nga gilusad ang Kiddie Squad sa Cebu City Police Office karung adlawa.
Kini ang gipahibalu ni CCPO Director Police Colonel Royina Garma. Gipasabut ni Garma nga katuyuan sa maong kalihukan mao ang paghatag ug kahigayunan sa mga bata nga ma-expose sa mga police works.
Apan giklaru niini nga dili nila ilakip ang mga bata sa police operation inay kutub lang kini sa administrative works, ingun man sa mga ipahigayun nga community-relation activities.
Matud pa nga sa maong paagi makat-un ang mga bata sa pagtahud sa balaud, pagmahal sa nasud, ingun man ang maayu nga relasyon ngadtu sa kapulisan.
Gibutyag usab ni Garma nga automatic nga malakip ang mga bata nga nahimu nilang beneficiaries sa ‘Kid Sagot Kita’ niadtung nakalabay nga Pasko. Apan mamahimu man usab nga malakip ang mga nagagikan sa ubang sektor.
Gihimug-atan ni Garma nga makaya nila ang pag-sustain sa maong programa gumikan kay igu man ang ilahang funds.Hinu-un, sigon pa nga mamahimu lang nga maka-donate ang ubang sektor apan dili lang in-cash.
Ang mga bata nga misalmot niini ang nag-edad 8 hangtud na sa 12 anyos.
Nasayran nga ang Kiddie Squad maghatag ug higayun sa mga bata nga mahimung ‘little station commander’ ug adunay pinili nga mga bata nga mulingkud isip city director. (SBR/FDP)
