Nihangyo si Lanao del Sur Rep. Zia Alonto Adiong gyo sa National Bureau of Investigation (NBI) nga imbestigahan ang bag-o lang nga pamahayag ni kanhi Presidente Rodrigo Roa Duterte bahin sa pagpatay sa 15 ka mga senador aron makalingkod sa katungdanan ang ilang mga kandidato.
Matod ni Adiong, kon molusad og imbestigasyon ang NBI sa giingong pagpanghulga ni Bise Presidente Sara Duterte batok nila ni Presidente Ferdinand Marcos Jr., First Lady Liza Araneta-Marcos, ug Speaker Ferdinand Martin Romualdez, angayan lang nga susihon usab ang mga pamahayag sa kanhi presidente.
Sa usa ka panagtapok sa San Juan City, si Duterte namulong bahin sa umaabot nga piniliay ug sa kasamtangang komposisyon sa Senado.
Diin nisugyot kini og radikal nga paagi aron maseguro nga makadaog ang iyang mga kandidato nga kaalyado.
Ang iyang pamahayag gisugat og kusog nga paghugyaw sa iyang mga supporter, kinsa dungan nga misinggit og ‘patya’.
Gihatagan og gibug-aton ni Adiong nga dili angay ibaliwala ang maong mga pamahayag, ilabi na nga adunay mga higayon nga giaksiyonan sa mga dumadapig ni Duterte ang iyang mga pulong.
Iyang namatikdan nga bisan og si Duterte mahimong moinsistir nga ang iyang mga pulong usa lamang ka komedya, “dili niya matago ang hulga sa mga senador luyo sa usa ka joke.”
Tungod niini, iyang giawhag ang NBI nga susihon kon ang maong mga pamahayag, ilabi na kadtong nagtumbok sa kapintasan, sakop ba sa kasamtangang mga balaod.
