CEBU CITY- Nagbaha ang emosyon sa sesyon sa Cebu City Council human gisalikway ang resolusyon nga mag-akreditar sa Asian College Technology International Education Foundation (ACTIEF)–Pit-os campus alang sa city scholarship program.
Makita ang kasubo ug kabalaka sa mga estudyante gikan sa northern mountain barangays nga mitambong sa sesyon, ilabi na kay direktang maapektuhan ang ilang kahigayonan nga makaskwela duol sa ilang komunidad.
Ang resolusyon, nga gisulat ni Councilor Alvin B. Arcilla, nagtumong sa paghatag og awtoridad kang Nestor Archival sa pagpirma og Memorandum of Agreement (MOA) uban sa ACTIEF. Apan, napildi kini sa konseho pinaagi sa boto nga 8–7.
Kung diin, ang mibotar supak sa resolusyon mao sila Konsehal Mikel Rama, Harold Kendrick Go, Pastor “Jun” Alcover, Jaypee Labella, Joel Garganera, Philip Zafra, Dave Tumulak, ug Harry Eran.
Samtang ang misuporta sa maong lakang mao sila Konsehal Alvin Clay, Michelle Abella-Cellona, Sisinio Andales, Nice Archival, Rhea Jakosalem, Paul Labra, ug Jose Abellanosa.
Sumala sa mga misupak sa mosyon, adunay kabalaka sa posibleng conflict of interest ug giingong mga iregularidad nga nalambigit sa maong proposal.
Ang desisyon sa konseho nagbilin og dakong pangutana ug kabalaka alang sa kapin sa 1,600 ka mga gradwado sa senior high school gikan sa mga bukirong barangay, nga posibleng mapugos sa pagbiyahe og layo aron makapadayon sa ilang pagtuon sa kolehiyo.
