CEBU CITY — Mihangyo si Cebu City Mayor Edgardo Labella sa konseho ilang hatagan og pagtagad ang gihana-ay niining “10-point goals” alang sa kalambuan sa dakbayan.
Atol sa inaugural session sa mga City Council, gi-awhag ni Labella nga arubahan sa mga konsehal ang supplementary project nga gi-umol alang sa 10 ka mga priorities sa lugar.
Naglangkub kini sa pagbaha, negosyo, trapiko, basura, utang sa South Road Properties, pagpatukod sa Cebu CIty Medical Center, Cebu City College, peace and order ug paghuman sa Carbon Public Market Phase 2.
Mipadayag si Labella nga makig-alayon ang gobyerno sa Department of Public Works and Highways (DPWH) ug sa mga kasikbit nga syudad aron siguraduhon nga dili magbaha ang mga kadalanan.
Samtang gipasiguro sa mayor nga mamenosan ang kabug-at sa dagan sa trapiko pinaagi sa pag-instalar og mga bag-ong digital traffic system.
Samtang nanghinaut si Labella nga matukod ang Cebu City College sulod sa iyang termino.
Magpatabang usab si Labella sa konseho aron makabayad ang City Government sa mga utang niini ilabi na sa mga luna sa South Road Properties.
Gi-awhag usab sa mayor ang mga konsehal nga mohimo og mga ordinansa ug resolusyon aron maserbisyuhan ang mga Sugbuanon pinaagi sa 10 ka mga agenda.
