CEBU CITY — Gipasidan-an ni Mayor Edgardo Labella ang mga opisyal sa barangay nga mag-atubang og tulubagon kung dili sila magpakabana sa pagmentenar sa kahinlo sa ilang mga sapa.
Matud sa mayor nga posibleng mag-atubang og suspension ang mga kawani sa barangay kung dili nila masiguro ang kahinlo sa mga kasapaan.
Kini ang nahimong reaksyon ni Labella human masayud nga nanglabay gihapon og basura ang mga nagpuyo duol sa kasapaan bisan pa man og gihinloan kini sa mga empleyado sa Cebu City Hall atol sa ilang clean up drive.
Kahinumduman nga moabot sa 21 ka tonelada nga basura ang nahipos atol sa clean-up drive niadtong weekend sa Guadalupe river.
Nagkanayon si Labella nga motabang gayud ang mga barangay officials sa pagbantay ug pagsita sa mga naghugaw-hugaw sa ilang mga sapa.
Dugang pa sa mayor nga kung mahimo paisyuhan og citation ticket ang mga residenteng naglabay og basura ilabi na sa mga nagpuyo duol sa kasapaan.
