Gikatahong duha ang kompirmadong patay ug kapin sa libo ka mga panimalay, negosyo ug uban pang mga edipisyo ang gilamoy sa tulo ka dagkong sunog sa Los Angeles County.
Sa Pacific Palisades, ang sunog sa Palisades kay nakasunog sa kapin 5,000 ka ektarya ning Miyerkules sa buntag, diin nagdilaab ngadto sa Pacific Coast Highway ug gilamoy ang mga balay.
Samtang ang sunog sa Eaton, nga miulbo niadtong Martes sa gabii, nakasunog sa kapin sa 2,200 ka ektarya duol sa Altadena ug Pasadena nga gibunalan sa paghuros nga hangtod sa 99 mph sa lugar.
Matud ni Los Angeles City Council President Marqueece Harris-Dawson nga dakong hagit karon ang pagpalong sa sunog kay dili sila makagamit og eroplano tungod kay delikado tungod sa haguros sa hangin.
Samtang, dul-an sa 2,000 ka mga bomber na ang mitabang sa pagpawong sa naasoy nga sunog.
Tungod sa insidente, gikanselar usab sa mga otoridad ang mga klase sa eskuylahan ug gisusi usab sa mga otoridad ang hinungdan sa sunog.
