Mokabat sa P2.9 milyon ang nakolekta, sa gipahigayon nga labing-unang Governor’s Zero Hunger Run para sa seguridad sa pagkaon ug mga programa sa nutrisyon human nakadani og 3,500 ka partisipante nga gihulagway ni Cebu Gov. Pamela Baricuatro nga unang lumba sa nasud nga gipahinungod sa pagpakigbatok sa kagutom.
Giorganisar sa Cebu Provincial Sports Commission isip kabahin sa selebrasyon sa ika-457 nga Founding Anniversary sa Probinsya sa Sugbo, ang kalihokan sa pagpangalap og pundo samtang naghiusa sa mga runners gikan sa tibuok probinsya aron suportahan ang kampanya sa Zero Hunger sa Kapitolyo.
Si Gov. Baricuatro, kinsa miapil sa 1K fun run uban sa mga bisita, mga opisyal ug empleyado sa Kapitolyo, nagpasalamat sa mga partisipante sa paghimo sa adbokasiya nga iyang gitawag nga usa ka kalihukan.
Ang gobernador miingon nga ang kita gikan sa kalihokan makatabang sa pagpondo sa mga inisyatiba nga nagtumong sa pagpalambo sa seguridad sa pagkaon ug nutrisyon sa mga Cebuano.
Nagpasalamat si Gov. Baricuatro sa Cebu Provincial Sports Commission, event organizers, mga miyembro sa Provincial Board, mga departamento ug empleyado sa Kapitolyo, mga LGU participants, mga volunteers, ug uban pang mga ahensya nga nakatabang sa pagsiguro sa kalampusan sa kalihokan.
Nagpasalamat usab ang opisyal sa mga sponsor ug partner sa kalihokan, ingon man sa liboan ka mga runner kansang partisipasyon nakatabang sa paghimo sa unang Governor’s Zero Hunger Run sa probinsya nga usa ka malampuson nga inisyatibo sa pagpangalap og pundo.
