Gilauman sa Partido Manggagawa nga hisgutan ni Pangulong Ferdinand Marcos Jr. ang mga nag-unang isyu sa pamuo sa iyang ikalimang State of the Nation Address (SONA).
Sumala kang Partido Manggagawa Chairman ug kanhing kongresista Rene Magtubo, lima ka dagkong isyu ang ilang gilauman nga matubag sa pangulo.
Una, ang nagkataas nga ihap sa walay trabaho ug ang padayon nga pagkaylap sa contractualization.
Ikaduha, ang pagsaka sa presyo sa mga batakang palaliton ug ang kalisod sa mga mamumuo, ilabina kadtong nagdawat og ubos nga suhol, sa pagsukol sa nagkataas nga gasto sa panginabuhi.
Ikatulo, ang dako nga kal-ang tali sa minimum nga sweldo ug sa tinuod nga gasto sa panginabuhi o cost of living sa tibuok nasud.
Ikaupat, ang mga isyu nga may kalabotan sa pagkontrol sa baha ug uban pang mga proyekto sa imprastraktura sa gobyerno, nga matod niya adunay dakong epekto sa mga kabus nga komunidad.
Ikalima, ang padayon nga kakabus nga nasinati sa nagkalainlaing sektor, nga giingong wala pa mahatagi og igo nga pagtagad sa gobyerno.
Matod pa ni Magtubo, kung nahimong bantugang linya ang pahayag ni Pangulong Marcos nga “Mahiya Naman Kayo” sa iyang ika-upat nga SONA, angay usab, aniya, nga madungagan kini og, “Mahiya Naman Kayo sa Manggagawang Pilipino.”
Gidugang pa niya nga sa upat ka tuig sa administrasyon ni Pangulong Marcos, wala pa makabatyag og mahinungdanong kausaban ang mga mamumuo sa ilang kahimtang, ug daw nahibilin ang sektor sa pamuo sa mga prayoridad sa gobyerno.
