LAPU-LAPU CITY, CEBU-Gikataho na usab ang laing giingong pagdagit sa Pusok Police Station sa dakbayan sa Lapu-Lapu.
Niining higayona, ang biktima mao ang 19-anyos nga dalagita kinsa giingong gidala samtang naglakaw sa Sitio Matumbo, Barangay Pusok niadtong Hulyo 27, 2023 sa gabii.
Kining pinakaulahi nga insidente nahitabo pipila ka semana human ang upat ka mga menor de edad nitaho nga nakalingkawas sila sa pagdagit sa Barangay Bankal, sa dakbayan usab sa Lapu-Lapu.
Matud pa ni Police Major Dexter Basirgo, hepe sa Pusok Police Station, nga ang biktima, kansang identity itago tungod sa seguridad, nipasangil nga adunay babaye nga niduol kaniya samtang naglakaw aron mangutana kaniya kon kaila ba niya ang anaa sa hulagway nga gikugos sa babaye.
Matod sa biktima nga kalit lang nibutang og panyo ang babaye sa baba sa biktima.
Nagtuo ang biktima nga adunay butang ang panyo nga nahimong hinungdan nga nawad-an siya sa panimuot, ug sa ulahi iyahang namatikdan nga gikarga siya sa usa ka van.
Sa pagmata sa biktima, anaa na siya sa hilit nga dapit sa Barangay Tawason, dakbayan sa Mandaue.
Dugang pa, nga nakit-an usab niya sa iyahang tupad ang usa ka bata nga lalaki.
