CENTRAL VISAYAS- Gilauman nga makasinati na og mas maayo nga panahon ang Sugbo sugod karong adlawa, Domingo, Hulyo 12, 2026, bisan pa sa impluwensya sa habagat ug sa nahibiling epekto sa Bagyong Inday nga maoy hinungdan sa kusog nga hangin ug madag-umon nga kalangitan sa miaging mga adlaw.
Matud ni PAGASA Visayas Weather Specialist Mark Gales, gilauman nga mohinay ang epekto sa habagat sugod karong adlawa, diin mahimong partly cloudy to cloudy ang kalangitan uban sa panagsang pag-ulan, pagdagsub, ug pagpangidlat.
Bisan pa niini, gipahimangnoan sa PAGASA ang publiko nga dili dayon hingpit nga moayo ang kahimtang sa panahon, busa kinahanglan nga magpadayon ang tanan sa pag-amping.
Sa laing bahin, gilauman usab nga mobalik na ang operasyon sa pipila ka mga biyahe sa barko tungod sa pag-ayo sa kondisyon sa dagat, lakip na ang mga ruta sa Toledo–San Carlos City ug Danao–Camotes.
Samtang, gilauman nga magpadayon ang kusog nga hangin hangtod sa Lunes, Hulyo 13, ilabina sa Kasadpang Kabisay-an ug Negros Occidental, sa dili pa hingpit nga mokalma ang kahimtang sa panahon sa tunga-tunga sa semana.
Nanawagan usab ang PAGASA sa publiko nga padayong subayon ang labing bag-ong weather advisories ug magmatngon sa posibleng kalit nga kausaban sa panahon.
Kahinumdoman nga migawas ang Bagyong Inday sa Philippine Area of Responsibility (PAR) alas 8:20 sa buntag niadtong Sabado. Ang sentro niini kataposang namatikdan sa gibanabanang 590 kilometros amihanan-amihanan-sidlakan sa Itbayat, Batanes, nga adunay pinakamakusog nga hangin nga 140 kilometros matag oras ug pag-unos nga moabot sa 170 kilometros matag oras.
Ang bagyo kasamtangang naglihok paingon sa amihanan-amihanan-kasadpan sa gikusgon nga 20 kilometros matag oras ug gilauman nga mo-landfall sa sidlakang baybayon sa mainland China karong adlawa, sa dili pa kini mohinay ug mahimong usa ka severe tropical storm.
