LILOAN, Cebu – Selos nga dili mapugngan ang nagtukmod sa usa ka lalaki nga pusilon ang iyahang kapuyo kaganihang kadlawon sa Sitio Mahayahay, Barangay San Vicente, lungsod sa Liloan, Cebu.
Giila ang suspek nga si Eldie Orquiza, 27 anyos, samtang ang biktima mao si Blanca Paige Bayang, 25 anyos, pulos nanimuyo sa nahisgutang dapit.
Sa pakighinabi sa Bombo News Team, gisaysay ni Police Master Sergeant Jonas Catubig sa Liloan PNP, nga basi sa ilahang inisyal nga imbestigasyon, nakadungog ang mga silingan nga naglalis ang duha sa wala pa manglakaw ug sa dihang nanggawas na kini sa ilahang gipuy-an, giingong nadunggan na ang sunod-sunod nga buto apan gumikan sa kahadlok wala’y bisan usa nga migawas ug nagpakisusi.
Pasado alas 5 kaganihang buntag sa dihang nakaplagan nga wala na’y kinabuhi ang biktima diin nakita nga aduna kini samad pinusilan sa iyahang ulo.
Matud pa nga misuway usab pag-eskapo ang suspek apan nadakpan gayud kini sa lungsod sa Santander.
Nasayran nga kanunay maglalis ang duha gumikan kay giingong hilabihan kung magselos ang suspek.
Apan sa pagkakarun, giingong nagpabiling tak-um ang suspek sa krimen nga iyahang gibuhat.
Kasong murder ang ipasaka ugmang adlawa batok sa suspek.
