CEBU CITY- Nasikop ang usa ka 20-anyos nga ulitawo human madakpi sa ginadiling drugas ug pagkupot sa dili lisensyado nga Armas sa Sitio Mabuhay Brgy. Luz Dakbayanan sa Sugbo sa may alas 12:05 ang takna sa tungang gabii Enero 7, 2025.
Sa pakighinabi sa Bombo Newsteam kang PMAJ. Romeo Durano Caacoy Jr., ang hepe sa mabolo station, gitino niini nga atol sa pag-roving sa mga sakop sa kapulisan sa Mabolo Police Station (PS4) nga gipangulohan niya nasuta nga kining 20 anyos adunay dalang armas.
Hinungdan, nga dali kini nilang gisita ug gi-alarmahan og nakuha kaniya ang armas nga gidala niini ug aduna usay pipila ka mga gagmay’ng pakiti sa gituohang shabu.
Giili niini ang 20 anyos nga si Wyleen Pacaña Banono ulitawo walay trabaho ug lumulupyo sa sitio upper Laguerta Brgy. Lahug dakbayan sa Sugbo.
Nakuha sa posisyon sa maong dinakpan ang 4.5 grams sa getoohang shabu ug mo balor sa kantidad nga 30,600 ka pesos ug usa ka unit sa 45 nga kalibre ug adunay usa ka magazine.
Sa impormasyon nga nahipos ni Major Caacoy, usa kini ka street level individual ang dinakpan ug taud-taud na nilang nasayran nga nagdula kini sa ginadiling druga.
Dugang pa ni Major Caacoy, nga na priso na kining dinakpan kaniadto sa susamang kaso sa pagdula sa illegal nga drugas.
Kasamtangan nga anaa sa Mabolo Police station ang maong dinakpan ug posibling mag atubang sa kasong illegal position of firearms ug paghupot sa ginadiling drugas.
