PROVINCE OF CEBU-Namatay ang usa ka lalaki sa Samboan, habagatang kasadpan sa Sugbo samtang nagluto ug pinaugang lubi, o gitawag og kopras sa Cebuano, niadtong Miyerkules, Hunyo 14, 2023.
Giila sa mga kapulisan sa lungsod sa Samboan ang biktima nga si Luis Binag Tulabing.
Matud pa, nga ang 46-anyos nga lalaki napalgan sa iyang mga kabanay nga wala nay kinabuhi atubangan sa giluto niyang kopras.
Base sa findings sa kapulisan, hingpit nga nasunog ang ulo ug bukton ni Tulabing samtang grabeng samad paso ang napalgan sa iyang tiyan.
Matod sa mga imbestigador, nagtuo ang pamilya nga posibleng adunay epilepsy si Tulabing.
Ang iyang ig-agaw nitug-an sa kapulisan nga ang biktima nag-antos na sa epilepsy kaniadto.
Duha ka adlaw sa wala pa mamatay, usa ka silingan ang nagsuhol kang Tulabing aron magluto og kopras alang sa usa ka fiesta, diin ang biktima miapil usab sa pag-inom.
Sa laing bahin, ang igsuon sa biktima nga giilang si Fe Tulabing nitug-an sa kapulisan nga nagduda sila nga walay foul play sa hinanaling kamatayon sa iyang igsuon ug nihukom nga ipaubos sa autopsy.
