Naluwas ang usa ka Nepali mountain guide human ma-stranded sa Mount Everest sulod sa halos unom ka adlaw nga walay igong oxygen, pagkaon, ug kapuy-an.
Giila ang lalaki nga si Dawa Sherpa, nga gituohang patay na samtang nanaog gikan sa kinatumyan sa Everest human nawad-an og kontak.
Apan human sa unom ka adlaw, nakit-an siyang buhi sa usa ka cleanup team samtang hinay siyang nanaog paingon sa Everest Base Camp.
Gidala siya dayon sa ospital sa Kathmandu, diin gitambalan tungod sa dehydration, frostbite, ug bali nga mga bukog.
Miingon siya nga nawad-an siya og oxygen sa taas nga bahin sa bukid, hinungdan nga dili siya makalihok og tarong. Wala siya’y pagkaon sa unang duha ka adlaw, ug yelo ang iyang gikaon ug giinom aron mabuhi.
Nakakita usab siya og tsokolate sa iyang bulsa nga nakatabang niya nga molahutay sa pipila ka adlaw.
Matod niya, natanggong siya human mahulog sa crevasse sulod sa mga duha ka adlaw ug tunga. Naluwas siya human matabonan sa snow, nga nakapugong sa dugang kadaot.
Human makagawas, migamit siya og mga pisi aron manaog bisan pa sa risgo sa avalanche.
