CEBU CITY-Nagtingkagol karon sa Guadalupe Police Station ang usa ka lalaki human niya gisulay pag-display ang gipahimong tarpaulin batok sa iyang ex-girlfriend nga giingong “cheater.”
Giila ang suspek sa alyas nga “Dodong”, 32 anyos, usa ka call center agent, ug lumolupyo sa Brgy. Cambaro, syudad sa Mandaue.
Matud pa sa kapulisan, makita sa tarpaulin ang conversation sa iyang kanhi uyab nga gidudahan niya nga aduna’y laing lalaki.
Lakip niini ang gahubo nga lawas sa babaye ug aduna’y dakong tatak nga “cheater” sa duha ka tarpaulin.
Dugang pa, ganahan na nga makigbulag ang babayi sa maong lalaki apan dili kini mosugot.
Mao kini ang hinungdan nga nagplano ang suspek nga i-display ang tarpaulin sa IT Park Cebu ug sa basketball court duol sa panimalay sa biktima.
Ang biktima nangayo og pakitabang sa Regional Anti-Cyber Crime Unit-7 hinungdan sa pagkasikop sa maong suspetsado pinaagi sa entrapment operation.
