Giila na sa mga otoridad ang patay’ng lawas sa lalaki nga napalgan nga naglutaw-lutaw sa kadagatan duol sa Pasil Fish Port sa Dakbayan sa Sugbo kaganihang buntag, Lunes, Pebrero 16.
Ang biktima nailhan nga mao si “RJ Saavedra Vega”, 39-anyos, ulitawo, walay trabaho, ug residente sa Sun Valley, Barangay Calamba sa maong dakbayan.
Nadawat sa Sawang Calero Police Station ang report may kalabutan sa maong insidente hinungdan sa dinaliang pag-responde sa mga sakop sa Scene of the Crime Operatives (SOCO) ug Emergency Rescue Unit Foundation (ERUF) aron makuha ang lawas gikan sa tubig.
Base sa eksklusibong pakighinabi sa Bombo Radyo Cebu Newsteam ngadto sa saksing si Airis Ibrada, nasayran nga niambak matud pa si Vega sa dagat kagahapon pa sa buntag, Pebrero 15, human kini gibadlong sa tag-iya sa bangka nga iyang gisabak-sakyan aron unta mamasul.
Bisan pa man sa pagtuo nga maantigo kining molangoy, nakit-an ang biktima nga nagkapa-kapa hangtod nga hingpit nga nitidlom ug wala na makit-i bisan pa sa pagsulay og tabang sa mga nakasaksi.
Milabay ang hapit 24 oras una hingpit nga nakit-an ang lawas sa mga roving guard sa CCLEX kinsa daling nipahibawo sa Coast Guard ug sa kapulisan.
Gitataw usab ni Ibrada nga duna’y posibilidad nga anaa sa impluwensya sa ginadiling drugas o “nag-iping” ang biktima hinungdan nga posible kining wala kasabot sa iyang “tama” sa dihang niamak sa tubig.
Sa pagkakaron, padayon pa ang gihimong imbestigasyon sa Sawang Calero Police aron pagsuta kon duna ba’y foul play sa maong hitabo o kon aksidente ba gayod ang kamatayon ni Vega.
