Nadakpan usa ka mananagat nga giingong nalambigit sa paghimo og dinamita ang human nasakmit sa mga awtoridad ang daghang mga homemade explosive device atol sa usa ka entrapment operation nga gihimo alas 3:27 sa buntag niadtong Biyernes, Hunyo 12, 2026, sa Purok 7, Barangay Hingotanan East, Bien Unido, Bohol.
Ang suspek giila nga si Donald Rabanos, alyas “Dondi,” 43, usa ka mananagat ug residente sa nahisgutang barangay.
Nakumpiskar gikan sa suspek ang tulo ka andam nang hinimo nga homemade dynamite explosive ug mga pakete sa gituohang ammonium nitrate, usa ka sangkap nga gigamit sa paghimo og dinamita, nga may gibug-aton nga 10.5 ka kilo ug gibana-bana nga nagkantidad og P8,400.
Nakuha usab sa mga awtoridad ang P400 nga kantidad sa marked buy-bust money ug lain-laing mga materyales nga gigamit sa paghimo og mga explosive device.
Ang operasyon gihimo sa mga personahe gikan sa Provincial Intelligence Unit sa Bohol Police Provincial Office, uban sa tabang sa Provincial Mobile Force Company-Bohol, Maritime Police, Naval Forces Central, ug sa Bien Unido Municipal Police Station.
Matud ni Pltcol Joseph Puyod Berondo nga nakadawat silag impormasyon bahin sa giingong pagbaligya sa dinamita sa suspek, nga nag-aghat kanila sa pagpahigayon sa entrapment operation.
Sigon niini nga ang mismo nga mga dinamita, iya kining ipamaligya ngadto sa mga nagkalainlaing mga mananagat nga mogamit sa dinamita sa pagpanagat.
Dugang pa ni Berondo, nga dako kini nga kalambuan sa pagkadakop sa mismong illegal nga bulohaton hilabi na sa mga mananagat nga misunod sa lagda sa saktong pagpanagat og ang pagpanalipod sa kadagatan sa probinsya.
Ang suspek kasamtangang gibalhog sa Bien Unido Municipal Police Station ug mag-atubang og mga kaso sa paglapas sa Sections 3 ug 4 sa Presidential Decree No. 1866, nga gi-amyendar sa Sections 1 ug 2 sa Republic Act No. 9516, nga nagsilot sa ilegal nga paghimo, pagbaligya, pag-angkon, pag-dispose, pag-import, o paghupot og eksplosibo o mga incendiary device.
