CEBU CITY– Padayun nga gipangita ang wala pa mailhi nga suspek sa pagpatay sa usa ka 29-anyos nga lalaki kinsa giingong kawatan ug tig-gamitan og drugas human kini gipusil samtang natulog alas 3:45 sa hapon niadtong Huwebes, Pebrero 1, 2024, sa Sitio Punyang, Barangay Duljo-Fatima, dakbayan sa Sugbo.
Giila ang biktima nga si Gee Ronan Vernal Oralde alyas Jordan, 29, ulitawo, taga Sityo Puntod, Barangay Mambaling, Oralde nakaangkon og samad pinusilan sa tuo nga bukton.
Gikabutyag ni Police Major Jonathan Taneo, ang hepe sa Mambaling Police Station, nga ang biktima natulog sa kahoy nga lingkuranan tupad sa billiard table, dihang niabot ang suspek ug gipusil.
Dugang pa nga ang biktima adunay reputasyon sa ilang komunidad nga kawatan nga nagsulod-gawas sa prisohan.
Giangkon sa inahan ug mga igsuon niini nga gipahimuslan usab sila sa biktima.
Usa usab sa hinungdan nga daghan ang nasuko sa biktima mao ang impormasyon nga usa kini ka drug runner nga ilisan og asin ang gidudahng shabu.
