CEBU CITY – Gidala na sa punerarya ang patay’ng lawas sa usa ka 56 anyos nga lalaki kinsa nga gisunog ang iyang kaugalingon sulod sa ilang panimalay sa Brgy. Basak, dakbayan sa Lapu-lapu City.
Giila ang biktima nga si Norman Mangubat Oyao, minyo, adunay 2 ka mga anak, ug residente sa nahisgutang dapit.
Matud sa pag-umangkon ni Oyao nga si Berna Flor Dayuhim nga depresyon ang nagtukmod sa biktima kung nganong gibubu ang iyang kaugalingon og gas dayon iya gisunog.
Miresponde dayon ang mga bumbero human nga nasunog ang kwarto ni Oyao apan wala na mikatap ngadto sa laing panimalay. Pagkapalong sa ka’yo, narekober sa mga bumbero ang napaig lawas ni Norman.
Wala usab nagtuo ang pag-umangkon ni Oyao nga matinuod ang pagsunog sa kaugalingon sanglit mibahad na kini sa pipila na ka higayon.
Nasayran nga gibiyaan si Oyao sa iyang asawa ug nakiglalis kini sa iyang igsuon.
