BOHOL-Patay ang usa ka lalaki human nakaangkon og daghang samad sa nawong, liog, tangkugo sa Purok 4, Barangay Linawan, Lungsod sa Anda, Bohol human gitigbas sa nawong kaniadtong Lunes, Hulyo 31, 2023.
Giila ang biktima nga si Rosendo Montoyan Flores, 51-anyos ug lumulupyo sa lugar kinsang nakabsan sa kinabuhi human gitigbas kini.
Gikatahong adunay kalalis si Flores sa mga niaging adlaw kabahin sa yuta ug nahimong hinungdan sa iyahang kamatayon.
Base sa imbestigasyon sa Anda Philipine National Police kon PNP, nasayran nga sa wala pa kini gitigbas adunay gitambongan si Flores og usa ka ‘birthday’ ug nakita pa kini sa mga kabanay nga nakauli sa ilahang balay arun matulog.
Wala damha nga mao na kadto ang ulahing katulog sa biktima.
Nakadawat og tawag ang Anda PNP alas 4:30 sa hapon mahitungod sa panghitabo ug girespondihan dayon kini sa mga kauban sa Rural Health Unit (RHU).
Apan, wala nay kinabuhi nga naabtan ang mga nirespondi.
Sa pagkakaron, wala hinganli sa mga kapulisan ang gikalalis sa biktima nga naka-ingon sa kangutngot nga gidangatan ni Flores.
Dugang pa sa mga kapulisan nga aduna na kini gitumbok nga suspek apan, gidumili pa ang pagbutyag sa pangalan tungod wala pay ni-testigo nga nitumaw arun masikop na ang suspek.
