CEBU CITY — Patay ang usa ka lalaki kinsa ang giingong gi-atake sa iyang kasingkasing human nga mitan-aw sa away nilang Manny Pacquiao ug Keith Thurman sa Brgy. Kalunasan, sa dakbayan sa Sugbo.
Giila ang biktima nga si Lorenz Dizon, 41 anyos, ug residente sa nahisgutang dapit.
Matud ni Cebu City Police Director Colonel Gemma Vinluan nga pagkahuman og tan-aw sa maong boxing match kalit lang nga naglisud og ginhawa si Dizon hinungdan nga nagpatabang kini sa mga barangay officials aron dad-on sa tambalanan.
Apan wala na makahigayon pa og luwas ang biktima human kini gideklarar sa doktor nga dead on arrival.
Samtang gidala usab sa tambalanan ang laing biktima nga si Margarito Casquejo, 60 anyos, ug taga-Brgy. Sawang Calero human usab mitan-aw sa away nilang Pacman ug Thurman pinaagi sa pay per view.
Kini gumikan kay nabantayan na lang sa mga higala niini nga maglisud og ginhawa si Casquejo samtang nagtan-aw sa boxing match.
Bisan pa man sa maong mga panghitabo, napaglantawan usab ni Col. Vinluan nga nagmalinawon ang dakbayan sa Sugbo atol sa panag-away ni Pacman.
Matud pa usab sa City Police Director nga “zero crime” ang ilang natala sukad nga nagsugod ang maong away sa boxing ring.
Nanghinaut gani si Vinluan nga mas maayo kung adlaw-adlaw unta ang adlaw sa Pambansang Kamao aron wala nay mahitabong mga kagubot.
