Nakadawat og bag-ong rekord sa Guinness World Records ang usa ka lalaki gikan sa Minnesota, USA nga si Joseph Grisamore human makabaton sa pinakataas nga ‘Mohawk spike’ sa tibuok kalibutan.
Adunay sukod nga 129.4 cm o kapin sa 4 feet ang gitas-on sa iyang buhok human kini i-estilo nga patindog o pa-spike.
Aron mapatindog ang iyang buhok sa maong kataas, nanginahanglan si Grisamore og tabang gikan sa iyang pamilya ug usa ka propesyonal nga hair stylist.
Daghang hairspray ug uban pang suporta ang gigamit aron mapabilin nga tul-id ang iyang buhok samtang gihimo ang pag-estilo niini.
Gipaambit usab ni Grisamore, dili sayon ang pagmentinar sa ingon kataas nga estilo sa buhok tungod kay mahimo siyang maglisod sa pagsulod sa mga pultahan, pagsakay sa sakyanan ug pag-agi sa mga lugar nga ubos ang kisame.
Dili usab kini ang unang higayon nga nakahimo si Grisamore og rekord sa Guinness World Records, human siya kaniadto nakakuha sa titulo nga ‘Tallest Full Mohawk’.
